ખાલીજગ્યાઓવાળો પ્રશ્ન કાઢી નાખો.

રોલ નં. 24

એ નટખટ છોકરીએ કહ્યું :
સર મને ખાલી જગ્યાઓ પૂરતા નથી આવડતું
હું એમ કરીશ ખાલી જગ્યાઓ ખાલી જ રાખીશ
તમે એ પૂરી દેજો.
મેં કહ્યું 'જો દીકરા, તારી ખાલી જગ્યા તો તારે જ પૂરવી પડે....
'ઓ સર...!' કહીને છણકો કરી એ નીકળી ગઈ.
બીજા દિવસે છાપાના છેલ્લા પાને વાંચ્યું
'કૌટુંિબક ઝગડામાં એક
વિધ્યાર્થિનીનો ગળાફાંસો'
અરે આ તો...
હું સ્તબ્ધ થઈ ગયો
બીજે દિવસે વર્ગમાં હાજરી પૂરતા
'રોલ નં 24'
કોઈ બોલ્યું નહીં
'રોલ નં. 24'
ફરી વર્ગમાં મૌન...
ક્યાં છે રોલ નં. 24...?
'સર એ તો...'
એક વિધ્યાર્થિની રડમસ અવાજે બોલી.
આખા વર્ગખંડમાં એક સન્નાટો ફરી વળ્યો
હું મારી જાતને ધિક્કારતો રહ્યો
એને અભ્યાસનું મહત્વ સમજાવતો રહ્યો
પણ જીવનનું મહત્વ સમજાવવાનું તો રહી જ ગયું
પરીક્ષામાં એના નંબરવાળી બેન્ચ ખાલી
ઉત્તરવહીના બન્ડલમાં એક ઉત્તરવહીની ખોટ
પ્રવાસે ગયાં
બધાં બાળકો બસમાં બેસી ગયાં
તોય મને કહે 'મારી એક દિકરીતો હજી આવવાની બાકી...'
બોલ
મારે ક્યાં કયાં તારી ખાલી જગ્યાઓ પૂરવાની...!
મેં તને કહ્યું'તુંને...કે તારી ખાલી જગ્યાઓ તો તારે જ...!
સૌ જાણે છે કે
ટેબલના ખાનામાં પડેલા હાજરીપત્રકમાં
કોઇના જવાથી પડેલ ખાલીજગ્યા
બીજા મહિને કોઈ દ્વારા પુરાઈ જાય 
પણ બહુ ઓછા જાણે છે કે
એક હાજરીપત્રક અમારા હ્રદયમાં હોય છે
એમાં ખાલી પડેલી જગ્યા ક્યારેય પૂરાતી નથી.
આચાર્યાબેને મિટિંગ બોલાવી
પુછયું
'પ્રશ્નપત્ર માં કોઈએ કોઈ ફેરફાર કરાવવો છે?'
મેં કહ્યું,
'ખાલીજગ્યાઓવાળો પ્રશ્ન કાઢી નાખો'
આચાર્યાબેને મારી સામે જોયું
મને એમની આંખમાં દેખાયા અનેક પ્રશ્નાર્થો
અને એ પ્રશ્નાર્થોની પાછળ
અનંત ખાલી જગ્યાઓ...

Good morning. ....