***
હરિ, નિશાળે આવો.
હરિ, નિશાળે આવો.
સરકારી શાળાનો થોડોક તમેય લ્યોને લ્હાવો...!!
પાછલી રાતના જાગી પાકાં પાઠ નહીં કરવાનાં
પરીક્ષા આપો કે ના આપો તોય પાસ કરવાનાં
આઠમા ધોરણ સુધી સડસડાટ ઉપર જ ચઢાવો..!!
હરિ, નિશાળે આવો...
વર્ગખંડ કરતાં પણ શિક્ષક રહે છે વર્ગની બહાર
બીએલઓ-એનપીઆર-ચૂંટણી કામોની ભરમાર
નિશાળનો હેડ માસ્તર તો છે જાણે ભટકતો બાવો..!!
હરિ, નિશાળે આવો...
સમૂહજીવન ને શ્રમકાર્યની વાત બધી જૂનવાણી
'બાયસેગ'ની ટેલિકોન્ફરન્સમાં નિરખો પ્રધાનવાણી
અહેવાલ-ફોટા-દેખાડાનાં અભિયાન ચલાવો...!!
હરિ, નિશાળે આવો...
ઉત્સવની ઉજવણી, ઇવેન્ટ્સ, સ્પર્ધા ચાલે રોજ
શિક્ષણેતર કામગીરીઓમાંથી માણો મોજ
સરકારીમેળામાં મ્હાલો, પ્રચારપતંગ ચગાવો..!!
હરિ, નિશાળે આવો...
આરટીઈ ને આરટીઆઇનું ભૂત ધૂણતું આવે
'સમયમર્યાદા'માં અંત્યંત જરુરી માહિતી મંગાવે
આવક-જાવકની ટપાલનો ખૂબ વધ્યો ફૂગાવો...!!
હરિ, નિશાળે આવો...
-એકલવ્ય